بعد اللف والدوران وسؤال الدكاترة اللى فالتامين الصحي الشامل، هقولكو اللى وصلت ليه بس طولو بالكو لان الموضوع طلع طويل.
هنتكلم عن الصحة الاول، كلنا عارفين نظام الصحة بيمشي إزاى، وأغلبنا أخد الامتياز بتاعه على الاقل ٣ شهور وزارة صحة ودخل وشاف الوضع عامل ازاى؟
* المرتب من 4000 وانت طالع فى حواز وفى بدل مناطق نائية وهكذا فقول بدايتك 4000.
* لو التكليف جه وزارة صحة فى محافظتك وعايز تنقل تامين صحي شامل ممنوع.
* لو التكليف جه صحة برا محافظتك وعاوز تنقل لمحافظتك تأمين شامل، ممكن عادي.
التامين الصحي الشامل.
التأمين الصحي الشامل، لو انت عايز عياده نضيفة وتشتغل فيها ومقابل عائد مادي كويس يبقا التأمين الصحي مناسب ليك، ولكن نظام الحضور فيه صارم جدًا، وهتتعرف عليه بعدين.
المرتب بيبدء من ٨٠٠٠ وقولت بيبدء تمام علشان ممكن يوصل لأكتر من كدا بكتير، على حسب الدرجه العلمية.
بينقسم ل نصين أساسي وحافز تعالا نقول مثلا ان المرتب ٨٠٠٠ (٥ اساسي و٣ حافز تمام كدا.
تحديث 2023 المرتب 10500 ج.
نظام الحضور في العيادة؟
- يوميا من 8 ص ل 3 العصر ماعدا الجمعه.
- او يوميا من 1 ظهرا ل 8 مساًء ماعدا الجمعه.
- او الحضور 15 يوم من 8ص ل 8 مساًء.
- أو 3 ايام في الأسبوع من 8 ص لـ 8 مساًء واليوم الرابع شيفت من ٨ الي ٣م.
حضورك حضرتك بتختاره عن طريق جدول تشغيل حضرتك بتقدمه للمدير الطبي و هو بيرفع للـ HR المهم أنك تكمل عدد ساعات شغلك الشهريه الي هي تقريبا 182 ساعه اللي هيا 45 ساعه فى الأسبوع.
نظام الغياب والخصومات في منظومه التأمين الصحي الشامل.
الحضور من ٨ لـ ٨ ونص إتاخرت ٥د يتحسبلك مدة تاخير اد اى ويضاف عالمعاد الاساسي اللى هو ٨ ( يعني روحت الوحدة ٩ الا تلت فكدا تاخير ١٠د ... يقولك لا انت كدا متاخر من ٨ ل ٩ الا تلت يعني ٤٠د ) حلو كدا.
- 120د تاخير يتخصم ربع الحافز.
- طب 240د يتخصم نص الحافز.
- طب اكتر من 360د بيتخصم الحافز كله اللي احنا قايلين عليه فوق مثال ٣٠٠٠ج فهتقبض ٥٠٠٠ بس اللى هو الاساس.
- غبت يوم كامل خصم الف جنية.
- ولو عملوا تواجد وانتَ مش موجود خصم الف جنية.
ليك فالمدة بتاعتك تارجت عدد من الحالات لازم تخلصه طب مخلصش يتخصم من الحافز، تقريبا ١٥ حالة فى الشفت الواحد لكل حاله 25 دقيقه.
الشغل في الواحدات بيكون خلع وحشو عادي وحشو عصب للأسنان الـ anterior والـ premolar، أنما في المستشفى بيكون حشو وخلع الضروس الخلفية وخلع ضرس العقل.
طب الفلو قليل ومعرفتش أخلصة بيعملو حاجة إسمها تقييم ويبدءو يشوفو كام واحد دخل وبنسبة وتناسب كدا بيقولك خلاص انت حققت مثلا ٩٥٪ لان الفلو هو اللى قليل.
* بيتم تقييمك من جهتين جهة الوحدة اللى انت فيها وجهة الرعاية الصحية وبناءا على التقيم والنسب بيتم خصم من الحافز على حسب كل نسبة.
نظام السكن للمغتربين؟
مفردات المرتب؟
- منسق الجوده 5%.
- ومكافحه العدوي 5%.
- والسلامه و الصحه المهنيه5%.
- ورضا المنتفعين 5%.
- سرعه الاستجابه للأوامر 5%.
- نسبه الحالات الي الدكتور بيشتغلها بالمقارنة بعدد الأطباء 5%.
- عدد الاخطاء الطبيه 5%.
- التسجيل الحالات علي السيستم 5%.
- مستهدف مالي- محدش بيعرف يوصله - 10%.
- تسجيل المبني للهيئه و جهه الاعتماد 15%.
- سرعه التسجيل الالكتروني و مده انتظار المنتفع 10%.
- رضا المنتفع و الشكاوي 5%.
الوظائف المتاحه للطبيب الأسنان في التأمين الصحي الشامل.
- طبيب أسنان وده الأساسي.
- الاداره، ماجستير إدارة أعمال أو دبلومه إداره المستشفيات، هتساعدك اكتر في القبول.
- وحده مكافحه العدوي، دبلومه من جامعه طنطا بتساعدك انك تاخد لقب أخصائي مكافحه العدوي وده بتذود فرصتك في القبول.
- وحده إداره الجودة، ولها دبلومه أيضا بس مش عارف التفاصيل.
- وحده الموارد البشرية، ويوجد دبلومه متخصصة لها.
التنقل من والى مديريات الصحة.
نيجي بقى لأهم نقطة وهي التنقل من والى مديريات الصحة او من والى وحدات التامين الصحي الشامل.
* بص لو تكليفك جه تامين صحي شامل ف اسماعيلية مثلا، وانت من الشرقية مثلا او اى محافظة داخلة تامين صحي شامل قريب ملكش تنقل من التامين الشامل لوزارة الصحة.
* وملكش تتقل من التامين الشامل بالاسماعيلية لـ التامين الشامل بالشرقية حتي بعد ما اتحولت الا بموافقة الطرفين.
* طيب انت تامين شامل وعايز ترجع مديرية صحة فنفس المحافظة .... ممنوع.
* طب انت مديرية صحة في محافظتك وعايز تروح التامين الشامل .... ممنوع.
طب انتِ عاوز تجرب وتشوف هتقدر عالتامين الشامل ونظامة ولا لا، ما انتَ متعرفش ومن حققك تختار، يبقى تتكلف فمديرية صحة هادى وتعمل انتداب لتامين صحي شامل لمدة سنة تقريبا عجبك الوضع ولاقيته تمام هتكمل السنتين بتوعك لحد ما تتثبت فالمكان.
طب الريسك هنا ف اى بقى الريسك لو انت من برا المحافظة واتكلفت تأمين صحي شامل مش هتعرف تنقل زى ما قولنا فوق، لانك هتتعين فالوحدة دى ثابت.
طيب مقدرتش ومعجبنيش الوضع برجع الوحدة بتاعتي وافضل فيها لحد ما هى كدا كدا هتتحول وانت ومحافظتك فى محافظات هتبدء ف ٢٠٢٥ وفى اللى ٢٠٢٩ وهكذا لحد ما تبقى تامين صحي شامل فمحافظتك وجنب البيت.
الخلاصه، لو انتَ دكتور وملكش عياده انزل اتعلم فى التامين نظام و عيادات نظيفه، لو ليك عياده ركز فيها و ربنا يبارك.