علشان تشتغل وتمارس طب الأسنان فى أمريكا بشكل قانونى محتاج تعمل معادلة، والمعادلة باختصار بتكون عبارة عن إجتياز امتحان inbde وتدرس سنتين بالجامعه، وبعد كده تقدر تشتغل كطبيب أسنان، ده باختصار نظرة سريعة وفية طرق تانية بعد إجتياز امتحان inbde هنتكلم عنها.
%20(1).webp "معادله طب الاسنان في امريكا")
ما هو امتحان inbde؟
الامتحان إسمه INBDE او إمتحان Integrated National Board Dental Examination، وهو أول وأهم خطوة في مشوار المعادلة اللى لازم تعدية، والعقبة الكبير اللي لو عدتها بنحس إنك حطيت رجلك على اول الطريق وإن كل اللي بعده في المتناول.
الامتحان عبارة عن نجاج وسقوط ومفيش درجه معينه للنجاح المهم إنك تدخل تنجح. النجاح من كام بقى؟ كل امتحان بيبقى لية درجه نجاح، يعني بتشوف كل الناس اللي امتحنت الامتحان ده ومن خلال حلهم للأسئلة على أساسه بتحدد درجة النجاح في هذه النسخة من الامتحان، ولو لسا مش فاهم اسمع الفيديو ده.
نظام إمتحان معادلة طب الأسنان بأمريكا؟
الامتحان عبارة عن 500 سؤال كلهم mcq على يومين وبيكون computerized يعني بيتحل كله على الكمبيوتر عشان كدة لازم تكون مدرب نفسك على المذاكرة والحل على لابتوب أو كمبيوتر.
اليوم الأول: عبارة عن 360 سؤال متقسمين أربع بلوكات كل بلوك ۱۰۰ سؤال، ماعدا آخر بلوك 60 سؤال، والـ 60 سؤال دول يكونوا عبارة عن cases يعنى بيجيب لك حالة بالـ history بتاعتها والـ clinical findings ويسألك عليها مجموعة من الأسئلة في الأغلب بيكونوا مرتبطين ببعض.
الوقت المتاح لكل بلوك أسئلة هو 100 دقيقة، وبتاخد بريك 15 دقيقة بين كل بلوك والثاني، ونص ساعة بريك في نص اليوم، فاليوم الأول تقريبا بيكون ٨ ساعات وربع لو إستخدمت كل البريك المتاحة ليك، واللي في الأغلب هتستخدمهم.
اليوم الثاني: 140 سؤال متضمين بلوكين كل بلوك 70 سؤال في 100 دقيقة، وكلهم بيكونوا cases، اليوم ده بيكون أقصر حوالي 4 ساعات وربع لكنه بيحتاج تركيز أكبر لأن الأسئلة ما يتيفاش قصيرة زي اليوم الأول.
مكان وتوقيت امتحان inbde؟
الامتحان بيتعمل في كل اوقات مختلف في السنة وعلى حسب المكان اللي هتختار تمتحن فية، وقت ما تكون جاهز في مذاكرتك إدخل واحجزه، وموقع الحجز بيجيب لك التواريخ المتاحة في المكان اللي انت بتختار الله تمتحن فيه.
الامتحان بيتعمل في مكانين بس في العالم، أمريكا وكندا الامتحان، وأمريكا أسهل نسبيا في الحجز عشان دي بلد الامتحان فكل بلد أو مدينة جوا أمريكا سواء مدينة كبيرة أو صغيرة هيكون فيها مكان يقدم الامتحان أما كندا فبيكون في أماكن معينة فقط في المدن الكبيرة.
أول خطوة هتعملها واللي هي الأهم على الإطلاق قبل ما تعمل أي حاجة إنك تدخل على موقع ال American Dental Association المعروف بالـ ADA وتعمل لنفسك حاجة اسمها ال Dent in اللي هتعمل بيه كل خطوات حجز الامتحان وتعرف بيه نتيجتك.
- شهادة التخرج باللغة الإنجليزية، أو لو جامعتك بتطلع بالعربي بس، فممكن تترجمها في أي مكتب ترجمة معتمد.
- الـ Transcript بكل المواد التي درستها في الكلية وعدد الساعات اللي قضيتها في كل مادة في كل سنة، دي ورقة بتطلع عادي من شئون الخريجين في الكلية بتقولهم عايز transcript بالانجليزي.
ينبعت الورقتين دول الشركة اسمها ECE دي اختصار لكلمة Educational Credential Evaluation عشان يعادلوا بيها ال GPA بتاعك بالنسبة للـ correculam بتاع طلبة الأسنان في أمريكا.
وفي جامعاتنا في مصر بندرس نفس المقرر اللي بيدرسه طلبة أسنان في أمريكا، فا بنسبة %99 هيترد عليك بانه تمام انت خريج كويس وتقدر تقدم عالامتحان.
الورق بيتبعت بالبريد، سواء أنت جوا أمريكا أو برة، فلو هتبعته من مصر هتبعته مع شركة شحن دولية زي DHL أو فيديكس، بتدخل على موقع الشركة دي التي هي ECE وتختار الأوبشن بتاع Course by course evaluation، وبعدها بيظهر لك العنوان اللي هتبعت عليه ورقك بالبريد.
في شركات تانية مختلفة ممكن تعمل على ال evaluation ده، لكن دي الشركة الوحيدة اللي كل الجامعات بتقبلها فممكن تقدم عالجامعة برضو بنفس الـ evaluation من غير ما تضطر تعمل واحد جديد وقت التقديم وتدفع ثاني.
بتعمل أكونت ويتدفع ۱۹۵ دولار، لازم يكون معاك كريديت كارد تدفع بيه، وبتختار إن الـ evaluation بتاعك يتبعت منه نسخة اليكترونية للـ ADA وكدة كدة بيتبعت لك الورق اللي أنت بعنته مع الـ evaluation بيتبعتلك على عنوان بيتك بعد ما يخلصوا.
بعد تقريبًا 3 أسابيع لشهر بيوصلك ايميل من ال ADA إن ال evaluation بتاعك وصلنا وكل حاجه تمام وتقدر تحجز الامتحان ومعاه لينك موقع حجز الامتحان.
تكلفة امتحان INBDE!
تكلفة امتحان INBDE بتكون 1200 دولار مقسمه الى 800 دولار رسوم الامتحان و 350 دولار علشان انتَ طالب دولى وحجز الامتحان بيكون من موقع cnde.
طريقة حجز امتحان inbde!
كل اللي هتحتاجه يوم أو يومين بس تستريح فيهم من اليوم الأولاني، متحطش أسبوع فاصل أو كذا يوم، لأنك بتزهق وبتفصل عن أجواء الامتحان.
وليك فترة ست شهور من تاريخ الحجز ودفع الفلوس على الموقع، تقدر تمتحن في أي يوم فيهم، فانت مش مضطر تختار اليوم من أول ما تحجز ممكن تحجز وتذاكر وتدخل تختار اليوم لما تحس انك جاهز للامتحان.
ولو عدا ال 6 شهور وما كنتش حددت يومين تمتحن فيهم فلوس الامتحان بتروح عليك، وهتضطر تحجز من أول وجديد وتدفع من أول وجديد لست شهور كمان.
طريقة المذاكرة لامتحان inbde والوقت المطلوب للتحضير؟
لو انت fresh grade ومتفرغ أو عندك وقت كفاية إدي نفسك 4 شهور مذاكرة متواصلة، لو هتذاكر جنب شغل أو مش قادر تتفرغ فمش أقل من 6 لـ 8 شهور.
طريقة المذاكرة: في سبعتلاف مصدر ممكن تذاكر منهم وكل واحد واجتهاده، يعنى الـ ADA عمرها ما هتقولك ذاكر من المصدر دة، الموضوع بيختلف من شخص للتاني ومعظم الناس اللي خدوا الامتحان قالوا على المصدرين دول.
المصدر الأول:-
- قناة يوتيوب اسمها Mental dental بتاعة دكتور ريان القناة عليها فيديوهات مجانية بتغطي معظم المواضيع اللي بيتناولها الامتحان الفيديوهات مش بتديك كل حاجة لكنها مهمة جدا تحطك عالطريق قبل ما تبدأ حل.
- باقي المذاكرة هي عبارة عن حل، وفي نهاية كل فيديو بيديك أسئلة تدريبية عالمحتوى. وهو عنده موقع باشتراك عليه أسئلة أكثر وال ppt بتاع السلايدز بس في الأغلب مش هتحتاج لده الفيديوهات المجانية هتكون كفاية كمقدمة.
- القناة عليها كمان فيديوهات عن طرق المذاكرة الكويسة وازاي الامتحان بييجى وتعمل ايه ليلة الامتحان وهكذا، حرفيا القناة مفيدة جدًا ومحتواها قيم.
المصدر الثاني:-
- المصدر اللى ما ينفعش حد يدخل الامتحان من غيره موقع Boot Camp وهو عبارة عن بنك أسئلة، للأسف الموقع مش مجاني ولازم تعمل إشترك، ومتاح تعمل عليه اشتراك 3 شهور أو 6 شهور أو سنة.
- لما تخلص مذاكرة الـ mental dental اشتراك فى البنك 3 شهور هيكون كفاية جدًا إنك تحل كل البنك، اشتراك الـ 3 شهور ب 400 دولار، وأوقات كتير بيعملوا خصومات فبيبقى ب 300 دولار وممكن تدور في جوجل على اكواد خصم هتلاقي إنشاء الله.
- البنك الحقيقة عبقري في شرحه لكل سؤال بيديهولك، فكل سؤال هو عبارة عن سيشن مذاكرة صغير وأوقات بيكون مزود بفيديوهات شرح مش بس كلام مكتوب بالإضافة للينكات المصار تخص السؤال لو الشرح بتاعهم مش كفاية ليك، وجميل في كونه مشابه تماما لطريقة الامتحان في الأسئلة المطروحة.
- والنصيحة المهمة هي إنك تحل البنك أكثر من مرة، لأنه في الأصل عبارة عن مذاكرة مش مجرد أسئلة فقط.
- موقع Boot Camp بيوفر لك إمتحان تجريبي بنفس طريقة عرض الأسئلة في شاشة وفي طريقة العد التنازلي للوقت وده مهم جدًا إنك تعرف مدى إستعدادك لدخول الامتحان.
- وإنك تجرب تقعد لمدة أكثر من ٨ ساعات متواصلة قدام الشاشة بتحل أسئلة امتحان في نصيحة مهمة للامتحان التجريبي بيفرق جدًا، ولازم تعامله كأنه امتحان حقيقي، يعني تقسمه على يومين.
- بنفس عدد بلوكات الامتحان، وتبدأ في نفس موعد الامتحان الصبح بدري، 7 أو 8 صباحا، وتأخذ نفس الـ 15 دقيقة بريك بنوع الامتحان الحقيقي بين البلوكات، وتكون محضر الأكل والسناكس والقهوة اللي هتاكلهم أو تشربهم في الامتحان عشان تعيش التجربة كاملة قبل ما تدخل الامتحان الحقيقي.
- الامتحان التجريبي بيتعمل قبل الامتحان الحقيقي بأسبوعين أو ثلاثة عشان لو لقيت نفسك بتجيب درجات كويسة ميكونش فية مدة طويلة قبل الامتحان وتنسى اللى ذاكرته
- وعشان برضو لو جيت درجات مش كويسة يكون لسة قدامك وقت تقيم هل أنت مستعد فعلا تدخل ومحتاج بس مراجعه سريعة على بعض النقاط اللي بتغلط فيها ولا أنت غير مستعد ولازم تأجل الامتحان.
- هو أسئلة الى ADA الموجودة على موقعهم، الامتحان مش هييجي زيها بالظبط بس هو بيديك فكرة مشابهة جدا لطريقةالامتحان بتيجي ازاي.
فكرة عن قاعة امتحان inbde؟
قبل الامتحان بيوم المكان اللي أنت حاجز فيه بيتصلوا بيك عشان يأكدوا معاك موعد البدء واللي محتاج تجيبه معاك واللي في الأغلب هيكون بطاقتين اثبات هوية الباسبور أولهم وأهمهم، الثانية ممكن تكون رخصة سواقة، أو اشتراك مكتبة أو نادي أو كريديت كارد أي حاجة عليها اسمك زي ما مكتوب في الباسبور.
هيتم تفتيشك قبل ما تدخل القاعة وفي كل مرة تخرج فيها من القاعة للبريك، فلازم تعمل حساب وقت التفتيش في الوقت المحتسب من داخل البريك عشان ما ياخدش من وقت البلوك اللي انت داخل عليه، لأنك هتكون في عرض كل ثانية مش دقيقة.
حاول تلبس هدوم سهلة التشمير لحد الكوع والتحت الركبة عشان في كل تفتيش هتشمرهم، وما يكونش فيها جيوب كتير عشان في كل تفتيش هتخرجهم لبرة عشان يتأكدوا إنهم فاضيين، ولو بتلبس نظارة ففي كل مرة النضارة متتحط على جهاز فحص وممنوع تدخل بجاكت لازم يتساب بره.
هتاخد لوكر بمفتاح تحط فيه كل متعلقاتك الشخصية والأكل بتاعك ممنوع تدخل بمية أو قهوة إلا لو كانت ازازة مية شفافة متشال من عليها الورقة. في قاعة الامتحان هيدوك ورقة وقلم والة حاسبة، الورقة زي سبورة صغير بيتكتب عليها ويتمسح عشان لو عايز تكتب حاجة وأنت بتحل.
وكان فية فيديو مهم لدكتور ريان بيقول فيه تكتب إيه في الورقة دي بالظبط أول ما تدخل الامتحان قبل ما تنساهم، وده فيديو بيوضح قاعة الامتحان عاملة إزاي وفيه كل التفاصيل دي وايه اللي تاخده وإيه اللي ما تاخدوش.
النتيجة: نتيجة الامتحان بتطلع بعد ثلاث الأربع أسابيع من تاريخ تاني يوم امتحان فيه بيتبعتلك ايميل إن النتيجة ظهرت بتدخل عاللينك تحط الـ Dent in بتاعك وتعرف نتيجتك، وزي ما قولنا النتيجة هي pass & fail.
ازاي ادخل أمريكا؟
لو مش معاك جرين كارد أو جنسية أو زوج أو زوجة فالطريقة الوحيدة هي إنك تدخل على فيزا سياحة:-
الفيزا السياحة يتقدم عليها على موقع السفارة الأمريكية ولو اتقبلت بتاخدها خمس سنين تقدر تدخل أمريكا في أي وقت خلال الخمس سنين دول بس ما ينفعش تقعد أكثر من ٦ شهور متواصلين على بعض.
تكلفة التقديم عالفيزا هي ٦ آلاف جنيه مصري الكلام ده في يناير 2024 علشان الرسوم دي بتزيد مع تغير سعر الدولار.
للأسف الفيزا بقت بتترفص كتير فعندك 5 حاجات لازم تعملها علشان تساعدك تاخد فيزا امريكا:-
- لازم تكون سافرت قبل كده ومتقوليش السعوديه والكويت وعمان يعنى روح بلاد سياحيه زى تركيا، تايلاند، قبرص، ماليزيا، اندونسيا دول اكتر دول رخيصه وفيزتها سهله ممكن تروحها.
- لازم كشف حساب يكون كبير وخلى بالك فوي فية ناس بتستلف فلوس وبتحطها فى حسابها وتطلع كشف حساب ب ٢٠٠ و ٣٠٠ الف وبرضه بيترفضوا وده لانهم بيبصوا على حركه الفلوس على الحساب لو حضرتك معاك ١٠ الاف جنيه ممكن تسحبهم وتحطهم كل اسبوع مره ولا اتنين وبعد 5 شهور هتطلع كشف حساب ب ٣٠٠ الف.
- لازم تقرا كويس عن اسئله السفاره ودى حلها تدخل المنتديات هتلاقى اللى راح السفاره كاتب اللى حصل بالضبط وبالذات الخليجيين اقرا كتير انا قبل معاد مقابلتى قعدت ٥ ايام بفلتر النت كله عن حكايات مقابلات السفاره الامريكيه.
- اعمل ورقه بالأسئلة اللى ممكن تتسال ليك واوعى تكتب اجابات حضر الاجابات فى دماغك لانك لو كتبت اجابات وحفظتها اللى بيعمل المقابله حيحس انك over prepared وهيلغبطك بسهوله جدا.
- اخر حاجه واهم حاجه اللى واقف فى السفاره بيعملك انترفيو دارس علم نفس كويس وهيعرف من نبره صوتك ووضع جسمك اذا كنت بتكذب ولا لا يعنى رايح وراجع ولا هتروح مترجعش علشان كده لازم تحضر نفسك وتقرا كويس عن الانترفيو عموما.
الفيزا الأول ولا حجز الامتحان؟
الافضل هو إنك تقدم على الفيزا الأول عشان تبقى ضامن إنك هتعرف تدخل الامتحان عشان ما تحجزش الامتحان ولا قدر الله الفيزا تترفض فتضطر تستنى شوية وتقدم تاني وساعتها يروح عليك معاد الامتحان وفلوس الامتحان وكدة كدة هيبقى معاك خمس سنين الفيزا سارية تقدر تحجز الامتحان في أي وقت.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وعلشان المقاله هتكون كبيرة الجزء التاني الخاص بما بعد الامتحان وكل الطريق المتاحة ليك لممارسة طب الاسنان في أمريكا من هنـــــــا.
وأخيراً إن كنت وصلت إلى هنا وأعرتنى جزءًا من وقتك فشكراً لك، ولا تترد في إعطاء رائيك في التعليقات، انا دكتور دينتيست سلام.