عُمان هي دولة تقع في منطقة شبه الجزيرة العربية، وتتميز بتنوعها الجغرافي والثقافي، حيث تجمع بين الصحراء والجبال والسواحل الجميلة. عاصمتها مسقط وتعد واحدة من أكثر الدول استقرارًا في المنطقة.
تم التعمين الكامل لمهنه طبيب الأسنان العام في عمان في القطاع الحكومي بسلطنة عمان، بعني أنه لا يمكن لغير العمانيين العمل في الحكومه، أما في القطاع الخاص، فالأمر مختلف، والفرص متوفرة.
كيفية الحصول على ترخيص طبيب أسنان في عمان؟
علشان تحصل على ترخيص للعمل كطبيب أسنان في عمان وتمارس مهنه طب الأسنان محتاج منك شرطين :-
1- سنة الامتياز + 4 سنوات خبرة.
الـ 4 سنوات خبرة مش شرط يكونوا شغل في الحكومه لو انتَ شغال في عيادة ممكن تجيب شهادة خبرة منها ولكن لازم تكون الشهادة متوثقة فى الشهر العقاري.
2- ترخيص ساري كطبيب أسنان في عمان.
ودة بيكون عن طريق عمل الداتا فلو والنجاح فى امتحان البرومترك العماني.
كيفية عمل الداتا فلو الخاصة بعمان؟
الداتا فلو هي عبارة عن شركة أمريكية مهمتها التأكيد على صحة شهاداتك من مصادرها و تعطيك شهادة بصحة شهاداتك المقدمة تكلفتها تحسب بالورقة لذلك لا تبالغ في الشهادات لأن التكلفة هتزيد عليك هتعملها عشان شهادة التخرج و الامتياز و الخبرة.
فيديو يوضح طريقة التسجيل للداتا فلو و البرومترك.
وممكن تعمل الداتا فلو بنفسك أونلاين لو معاك فيزا أو تروح لشركة تعملها لك و تدفع كاش ونتيجة الداتا فلو بتطلع بعد ٢٥ الى ٣٠ يوم.
امتحان البرومترك العماني؟
الامتحان بيكون على كمبيوتر واسمة اتغير من البرومترك وبقا بيرسون فيو لتغير الشركه المنظمة للامتحان، الإمتحان بيكون عبارة عن 150 سؤال mcq، ودخول الإمتحان يكون بجواز السفر ومدة الامتحان 3 ساعات تقريبا.
بعد ما تخلص بتطلب نتيجتك بتطلعلك على الكمبيوتر ولازم تكون اكبر من 60% علشان تنجح ويفضل تكون اكبر من 70% علشان النتيجة بتفيدك بعد كده.
حجز الامتحان أونلاين؟
هتحتاج فيزا دولي عشان تعرف تحجزه، وانتَ بتختار موعد الإمتحان و مكانه بيكون في:-
الجيزة في شارع محي الدين ابو العز بتوصله بالمترو قريب من محطة البحوث.
أو فى الاسكندرية في الـ American center شارع الشريف.
مصادر للمذاكرة البرومترك العماني؟
المذاكرة لإمتحان البرومترك العماني قريبا من مذاكرة البرومترك السعودي ودي خطة للمذاكرة تقدر تذاكر منها، وكمان دي مصادر زيادة تقدر تذاكر منها، ودول هيكونوا كفاية جدًا إنك تنجح.
كورس اسعافات أولية؟
مطلوب منك تاخد كورس اسعافات أولية BLS في American heart association بفروعه دور على العناوين على جوجل وخد الكورس منهم، هتلاقي لية فروع فى كل محافظات مصر تقريبا.
الامتحان الشفوي او الـ viva؟
بيكون عبارة عن إمتحان شفوي على 2 من الدكاترة وتكلفة بتكون 30 ريال عماني، والأمتحان دة بيكون بعد ما تلاقي عقد عمل، والإمتحان ممكن تمتحنة أونلاين من على زوم وانتَ في بلدك:-
الامتحان بيكون أسئلة و صور حالات على اللاب.
واللجنة لا تعطيك أي إنطباع اذا كنت بتجاوب صح أو غلط.
النتيجة بعد يومين إما ناجح أو راسب.
هتحتاج تذاكر كويس للامتحان و خليك واثق بنفسك وليك 3 مرات لو منجحتش في التلاتة هتحتاج تمتحن البرومترك تاني، علشان تقدر تخش الشفوي.
وخلى بالك، هيسألوك عن أورثو وإمبلانت اوعي تفتي، هتجاوب إنك طبيب عام ودة مش شغلك و هتحول للأخصائي، انتَ بتتسأل في الـ emergency و medicaally compromised pt.
بعد ما النتيجة تطلع لو انتَ ناجح صاحب العمل هيعمل لك تأشيرة تيجي بيها وتعمل الكشف الطبي وتطلع الإقامة ودي بتطلع في الشرطة في نفس اليوم و تبعت صورة الاقامة للصحة عشان تستلم ترخيص مزاولة المهنة بعد أسبوعين.
طيب لو منجحتش تحجز الإمتحان الشهر اللي بعده لحد ما تخلص الـ 3 محاولات وبعدها بيبقي لازم تمتحن برومترك تاني و تمتحن الشفوي، ونسبة النجاح في الامتحان تقريبا 50%، اجتهد انتَ بس واستعن بالله وربنا يوفقك.
ازاي تكون أخصائي اسنان في عمان؟
للأسف عمان وقفت الاعتراف بالماجستير المصري والسوري وعلشان تاخد أخصائي لو انتَ من مصر او سوريا :-
معاك دكتوراة من جامعة مصرية.
او زمالة بريطانيا متخصصة وليست عامة وبشرط يكون معاك جواب من بريطانيا إن التدريب بتاعك معتمد.
واكتر تخصصات مطلوبة هيا الارثو والامبلانت وفية طريقة علشان تاخد إمتياز امبلانت وتشتغل بية في عمان من غير ماجستير.
إمتياز الزراعة، والشغل كمتخصص زراعة فى عُمان؟
علشان تاخد إمتياز الزراعة وتشتغل امبلانت في عمان محتاج منك كام شرط كدة، لو مش معاك ماجستير معترف بية:-
كورس أو شهادة بـ 300 ساعة دراسة وتكون الشهادة معتمدة ومتوثقة في الداتا فلو.
هتحتاج تقدم log book فية، 20 حالة متصورة جراحة ومتوثقة.
تكون حصلت على ترخيص العمل في عمان واشتغلت فى عمان سنة كاملة
بعد اما تعمل التلت شروط دول تقدر تقدم للحصول على إمتياز إنك تشتغل زراعة، بتخش إمتحان الزراعة اللى بيكون مرتين في السنة وبعد الإمتحان بيكون فية مناقشة لبعض الحالات شفوى وبعد النجاح بتاخد الإمتياز علطول.
الأخطاء الطبية وحدود العمل كطبيب عام في عمان؟
شغل السعودية وانك تشتغل اول 6 اسنان بس دة مش موجود انت بتشتغل كل حاجه ما عدا الاورثو والزراعة والفينير، الاورثو لازم تكون أخصائي، الزراعه والفينير ممكن تشتغلهم بـ prevelage اللي هوا إمتياز اضافي زي ما اتكلمنا فوق.
انما الأخطاء الطبية بيكون فية تأمين ضد الأخطاءالطبية، يعني مثلا لو كسرت فايل اثناء الاندو فالتأمين بيشيل هوا تكلفة تحويل الحالة للأخصائي، لو مبلغ التحويل ما بين ألف ريال و حتى ١٥ ألف ريال، انما لو تحت الف ريال حضرتك اللي بتتحمل التكلفة.
مرتب طبيب الأسنان العام في عمان؟
متوسط الرواتب بتكون ما بين 600 إلى 800 ريال لطبيب الأسنان العام، يعتبر قليل نسبيا ودة بسبب كثرة عدد الاطباء وقلة الفرص المعروضة، وبالنسبة للفرص، الفرص حاليا بتييجي للي جاهز.
يعني تكون ممتحن و عامل داتا فلو و اسعافات أولية و لما تظهر فرصة إعلان عمل هتتقبل بسهولة، لكن مفيش صاحب عمل بينتظر حاليا إنك تعمل داتا فلو وتمتحن بيكون عاوز اللي جاهز.
ولو عايز تستفسر اكتر عن السفر لدولة عمان للعمل كطبيب أسنان ممكن تسأل في قسم التعليقات او ممكن في جروب أطباء الأسنان فى سلطنة عمان، انا دكتور دينتيست سلام.
